Ініцыятыва MALDZIS набыла на аўкцыёне ў Ізраілі малюнак яркага прадстаўніка Парыжскай школы мастацтва Восіпа Любіча, які быў родам з Гродна. Яго пакажуць у Варшаве.
Малюнак «Рабочыя» датуецца 1920-мі гадамі. Ён выкананы ў тэхніцы гуашы на паперы і падпісаны аўтарам. Гэта рэдкі прыклад ранняй творчасці беларуска-французскага мастака, паведаміў MALDZIS.
Малюнак быў набыты на сродкі мецэнаткі, якая пажадала застацца непублічнаю. У будучыні набыты MALDZIS твор плануецца перадаць у Гродна ў якасці грамадскага падарунка.
«Малюнак Любіча адкрывае новы раздзел у гісторыі дзейнасці MALDZIS. Гэта крок да фармавання больш цэласнага бачання беларускай культурнай спадчыны, якая ўключае не толькі архіўныя і гістарычныя каштоўнасці, а і выяўленчае мастацтва», — кажа апякун ініцыятывы MALDZIS Рыгор Астапеня.
27 чэрвеня малюнак можна будзе пабачыць у межах «Art-кавярні MALDZIS з Дзмітрыем Салодкім» у Варшаве.
Восіп Любіч (1896–1990) нарадзіўся ў Гродне ў яўрэйскай сям’і, атрымаў мастацкую адукацыю ў Адэсе, пасля чаго ў 1920 годзе пераехаў у Берлін, працаваў у тэатры, оперы і кіно. З 1923 года жыў у Парыжы і стаў адным з прадстаўнікоў Парыжскай школы. Ягоная творчасць уключае партрэты, пейзажы, нацюрморты, але найбольш вядомыя яго работы на тэмы тэатральнага і цыркавога жыцця. Падчас Другой сусветнай вайны быў арыштаваны і трапіў у лагер Дрансі, адкуль здолеў уцячы. Пасля вайны працягваў працаваць у Парыжы. Яго творы сёння захоўваюцца ў музеях і прыватных калекцыях розных краін, у тым ліку Беларусі — у Нацыянальным мастацкім музеі і карпаратыўнай калекцыі «Белгазпрамбанка».
Вы можаце абмеркаваць гэты матэрыял у нашым Telegram-канале. Калі вы не ў Беларусі, пераходзьце і падпісвайцеся.
