У Польшчы працягваюцца вайсковыя вучэнні Saber Strike 22. У рамках іх па дарогах адзінаццаці ваяводстваў, у тым ліку і Падляскага, пройдуць калоны вайсковай тэхнікі. Аб гэтым папярэджвае афіцыйны партал польскага ўрада.
Што будзе адбывацца на дарогах
Для вайсковага транспарту на дарогах паставяць адмысловыя знакі, якія не будуць датычыцца звычайнага грамадзянскага транспарту.
Вайсковая тэхніка будзе рухацца аўтамагістралях па A1, A2 і A4, хуткасных S8 і S61, а таксама DK16, DK18 і DK63.
Часцей за ўсё транспартныя сродкі, што будуць удзельнічаць у вучэннях, будуць рухацца да дарогах уначы. Аднак некаторыя паездкі тэхнікі пройдуць удзень.
Што такое Saber Strike
Вучэнні Saber Strike арганізуюць ад 2010 года. Сёлета вучэнні адбываюцца з планам падрыхтоўкі польскага войска і ў рамках Defender Europe 2022. Фактычна вучэнні ў Еўропе пачаліся яшчэ 24 студзеня, а скончацца толькі 1 красавіка.
Афіцыйная мэта — праверыць і прадэманстраваць здольнасць саюзных еўрапейскіх войскаў дзейнічаць у Еўропе.
Saber Strike 22 пройдзе ў Польшчы, Літве, Латвіі, Эстоніі, Чэхіі, Славакіі і Нарвегіі.
Вайсковыя вучэнні ў Беларусі
У Беларусі сумесна з Расійскай Федэрацыяй праходзяць вучэнні «Саюзная рашучасць». Яны пачаліся яшчэ ў студзені з перадыслакацыі войскаў, актыўная фаза пачалася 10 лютага. Улады абедзвюх краін абяцаюць, што вучэнні скончацца 20 лютага.
ЗША разам з еўрапейскімі партнёрамі заяўляе, што Расія прыкрываецца вучэннямі, а яе сапраўдная мэта — уварванне ва Украіну.
