У адным з Telegram-каналаў беларускіх сілавікоў з’явіўся пост, прысвечаны MOST. У ім прыводзіцца табліца людзей, названых «актывам, гісторыі якіх» (граматыка захаваная) публікаваліся. Мы прааналізавалі паведамленне і лічым правільным выкласці сваю пазіцыю.
У прыведзенай сілавікамі частцы табліцы змяшчаюцца персанальныя даныя дзесяці чалавек. Частка з іх супрацоўнічала з MOST, частка — гэта нашы героі, якія не былі супраць таго, каб мы раскрывалі іх імёны і фота (гэта значыць, інфармацыя была адкрытай). Пра частку людзей мы не рабілі матэрыялаў, але ведаем, што пад сваімі адкрытымі акаўнтамі (у тым ліку з фота ў профілі) яны пакідалі каментары на нашых рэсурсах.
— Трапляць у зводкі сілавікоў заўсёды непрыемна, але мы разумеем, што мэта такіх правакацый — запалохаць журналістаў, нашых герояў і нашу аўдыторыю і перашкодзіць нам выконваць сваю працу. Бо чым менш людзей будуць дзяліцца з намі сваімі дасягненнямі, праблемамі, перажытым, тым прасцей будзе гэта замоўчваць і фарміраваць скажоную карціну, выгадную прапагандзе, — кажа галоўны рэдактар MOST Руслан Кулевіч. — Але мы запэўніваем: мы нідзе не вядзём базу даных нашых герояў або кантактаў, таму яна не магла быць «злітая». Мы заўсёды прапануем сваім суразмоўцам ананімізацыю і прыкладаем усе намаганні, каб забяспечыць належны ўзровень абароны, калі яны не гатовы супрацоўнічаць з намі адкрыта. Нягледзячы на ціск, мы працягнем нашу працу, а з улікам узмоцненай цікавасці дадаткова праверым пратаколы бяспекі і прымем дадатковыя меры, каб знізіць рызыкі для нашых суразмоўцаў.
Як і многія медыя, якія працуюць у выгнанні, MOST з 2023 года прызнаны ў Беларусі экстрэмісцкім фарміраваннем. Калі вы лічыце нашую працу важнай, падтрымайце нас, калі гэта для вас бяспечна. Як гэта зрабіць, мы расказвалі тут.
